ذكريات شاعر

أنا كنت يوم شاعر

ما يتقطع لى لسان

بنبض الوطن شاعر

و الجرأة دى عنوان

ألعن فى كل حرامى

أشتم فى كل جبان

و سيفى كان كلمتى

فارس من غير حصان

كلامى يلمس قلوب

و يفجر البركان

لا عمرى يوم انحنيت

و لا خُفت م السجّان

أنا كنت يوم شاعر

فى الحب كان ياما كان

و قلبى كان بلوتى

دايماً عليل حيران

صابنى سهم الهوى

شُفت العذاب ألوان

خلص الغرام و انتهى

و الشوق طواه نسيان

يا اللى قريت غنوتى

و فى القلب ليها مكان

اصرخ و قول يا شاعر

زِدنا كمان و كمان

و داوى قلب انكوى

بالحب و الهُجران

ده الشعر ده هديتى

للصُحبة و الخلّان

هامشى و أسيب كلمتى

تضوى فى كل زمان

هشام الزيات